Երգչուհի Ադելը գաղտնի ժամանել Է Լոնդոն՝ նոր ալբոմ ձայնագրելու համար

Բրիտանացի երգչուհի և երգահան Ադելը գաղտնի կերպով Լոս Անջելեսից թռել է Լոնդոն՝ նոր երաժշտության վրա աշխատելու համար: Ըստ The Sun-ի՝ արտիստը մեկ ամբողջ շաբաթ՝ հունիսի 15-ից 21-ը, անցկացրել է Church Studios-ում։

Կարծիք կա, որ 38-ամյա Ադելին ուղեկցել են այլ երաժիշտներ, այդ թվում՝ ամերիկացի երգահան Ջասթին Վերնոնը, որը հայտնի է նաև որպես Bon Iver ինդի ֆոլկ խմբի հիմնադիր և գլխավոր վոկալիստ: Հրատարակության համաձայն՝ Վերնոնին ստուդիայում տեսել են հունիսի 17-ին: Դեռևս հայտնի չէ, թե արդյոք նա կմասնակցի Ադելի նոր երգերի ձայնագրմանը, բայց դեռևս 2016 թվականին նա հրապարակավ արտահայտել է իր համակրանքը նրա նկատմամբ որպես արտիստի: «Bon Iver-ի երաժշտությունն իմ սիրելիներից մեկն է», – այդ ժամանակ գրել էր Ադելը սոցիալական ցանցերում։

Ձայնագրման ստուդիան պատկանում է պրոդյուսեր Փոլ Էպվորթին, որի հետ փոփ աստղը սերտորեն համագործակցել է իր ողջ կարիերայի ընթացքում և որի հետ նա 2013 թվականին արժանացել է Օսկարի՝ Ջեյմս Բոնդի «Skyfall» ֆիլմի «Skyfall» երգի համար: Հենց Church Studios-ում է Ադելը ձայնագրել իր երրորդ՝ «25» ալբոմը 2015 թվականին։

Իրադարձությանը ծանոթ աղբյուրը The Sun-ին ասել է, որ նոր նյութի վրա աշխատանքը երգչուհուց կպահանջի մոտ երկու շաբաթ, սակայն մանրամասները ներկայումս գաղտնի են պահվում։ Աղբյուրի խոսքով՝ նա կշարունակի գալ ստուդիա հունիսի 22-ից 28-ը ընկած շաբաթվա ընթացքում։ Մեկ այլ աղբյուր հավելել է, որ Ադելն իրեն «անվտանգ» է զգում Church Studios-ում՝ ի տարբերություն Լոս Անջելեսի շատ ստուդիաների։ «Ադելը տասը տարի ապրում է Լոս Անջելեսում։ Նա սիրում է Լոս Անջելեսը, բայց միշտ կապ է զգում Լոնդոնի հետ», – բացատրել է աղբյուրը։

Երաժշտական ​​արդյունաբերության ներկայացուցիչները կարծում են, որ Ադելը կփորձի ձայնագրել ավելի «անգլիական» հնչողությամբ ալբոմ, քանի որ նրա նախորդ՝ «30» ալբոմը ձայնագրվել է ԱՄՆ-ում 2021 թվականին և, նրանց կարծիքով, «ավելի հոլիվուդյան» է եղել։ Աղբյուրները եզրակացրել են, որ արտիստը որոշել է թռչել Լոնդոն, այն բանից հետո, երբ իր մերձավոր շրջապատը համոզել է նրան «վերադառնալ իր արմատներին»՝ նոր երաժշտություն ստեղծելու համար։