The Weeknd-ի «Blinding Lights»-ը Spotify-ի պատմության մեջ առաջինն է, որն անցել է 5 միլիարդ լսման սահմանը
Written by 105.5FM on 1 September 2025
The Weeknd-ի «Blinding Lights» հիթը շարունակում է ռեկորդներ սահմանել երաժշտական ոլորտում: Spotify-ը հայտարարեց, որ երգը դարձել է հարթակի պատմության մեջ առաջինը, որը հասել է հինգ միլիարդ լսումների: Արտիստն ինքը կիսվել է լուրով իր 78 միլիոն հետևորդների հետ սոցիալական ցանցերում:
Այս ռեկորդը գրանցվել է ընդամենը մի քանի օր անց այն բանից հետո, երբ «Blinding Lights»-ը գլխավորել է Billboard-ի «Top Hot R& B/Hip-Hop Songs of the 21st Century» չարթը, որը կազմվել է 2000-ականների սկզբից մինչև 2024 թվականի վերջը «Hot R&B/Hip-Hop Songs» չարթից:
Սինգլը թողարկվել է 2019 թվականի նոյեմբերին՝ որպես «After Hours» ալբոմի մաս և չորս շաբաթ անընդմեջ զբաղեցրել է Billboard Hot 100-ի առաջին հորիզոնականը: Այն դարձել է առաջին երգը, որը մեկ տարի շարունակ եղել է լավագույն տասնյակում, իսկ 2021 թվականին այն գերազանցել է Chubby Checker-ի «The Twist»-ին՝ գլխավորելով Billboard-ի «Greatest of All Time Hot 100» ցանկը:
2024 թվականի հունվարին երգը դարձավ Spotify-ի պատմության մեջ առաջինը, որը հասավ 4 միլիարդ լսումների: «Blinding Lights»-ը The Weeknd-ի 28 երգերից մեկն է, որոնք ընդգրկվել են Spotify-ի «Billionaires Club»-ում, որը բոլոր ժամանակների ռեկորդ է արտիստների շրջանում։
The Weeknd-ը նշել է, որ «երբեք չի դադարի հիանալ այն փաստով, որ իր երաժշտությունը արձագանք է գտնում միլիոնավոր, նույնիսկ միլիարդավոր մարդկանց մոտ»։
