Քանյե Ուեսթը ցանկանում է ավարտե՞լ երաժշտական կարիերան

Լրատվամիջոցները լուրեր են տարածել, որ Քանյե Ուեսթը պատրաստվում է հեռանալ երաժշտությունից։ Մեծ բեմից հեռանալու ռեփերի որոշման մասին հայտնի է դարձել Rich The Kid-ի հետ նրա նամակագրությունից։

Ինչպես նշում է Daily Mail-ը, Ուեսթի գործընկերը սոցցանցերից մեկում հրապարակել է նամակագրության սքրինշոթը։ «Ես հեռանում եմ պրոֆեսիոնալ երաժշտությունից։ Չգիտեմ էլ ինչ անեմ»,- ասված է ռեփերին «Ye» անունով անձի կողմից ուղարկված հաղորդագրության մեջ։

Ի պատասխան՝ Rich The Kid-ը փորձել է աջակցել երաժշտին։ Նա նշել է, որ Ուեսթի համար դեռ վաղ է հեռանալ բեմից և մտածել թոշակի անցնելու մասին։ Ռեփերը գործընկերոջը հիշեցրել է իր վերջին՝ «Vultures 1» ալբոմի հաջողության մասին։

Սակայն շուտով, ինչպես նշել է Daily Mail-ը, Rich The Kid-ը ջնջել է ենթադրյալ Ուեսթի հետ նամակագրության սքրինշոթը։ Աղբյուրը ենթադրում է, որ ռեփերը նման քայլի է դիմել, որպեսզի ուշադրություն հրավիրի իր նոր ալբոմի վրա։ Ինքը՝ Քանյեն, առայժմ մեկնաբանություններ չի տվել այդ կապակցությամբ։